دوامة الدنيا

 لأول مرة في حياتي أحس بزهق من دوامة الحياه .. عارفين اكتر حاجة زهقتني في حياتي هو روتين الشغل اليومي و ضياع عمرك و حياتك كلها في الشغل من غير ما تحقق إللي نفسك كان فيه .. تلاقي اليوم بيخلص بسرعة مافيش وقت تشم فيه نفسك .. أو أي مجال تحس فيه براحة نفسية زى الاول .. حتى يوم الإجازة طاير منك مفيهوش بركة .. تحس إن حلم عمرك مات..

تفتكر إن ده ممكن بكون بسبب عوامل السن .. و لاا بسبب معاملة الناس .. و لاا  يمكن يكون بسبب خنقة الجو و تلوث الهواء و الأكل و المياه..  و لاا عشان الزحمة اللي احنا غرقانين فيها .. ولاا بسبب النفاق اللي بنشوفه في الوشوش إللي بتضحك في وشنا و بتغدر بينا أول ما بنديها ضهرنا .. 

ياه ه ه ..و لاا يمكن عشان كل اللي الواحد بيتمناه  صعب و مستحيل أنه يتحقق في عالم بتحكمه الماديات إللي بتتحكم في مصائر البشر من خلال الاقتصاد و التكنولوجيا..

في الواقع الواحد كان نفسه يعيش بعيد عن زحمة البشر إللي إبتلعتهم المدن الشريرة و بقوا عايشين أسرى في سجن  روتين بيحركهم بريموت كنترول .. تنام إمتى و تصحى إمتى و تفطر إمتى و تروح الشغل إمتى و تخرج إمتى و ترجع تاكل لقمة و بعدين تقعد أدام التليفزيون توجع دماغك لحد ما يجيلك نوووم.. 

نفسي أتحرر من السجن ده نفسي أبعد و أبعد .. نفسي أعيش في  مزرعة صغيرة حواليها نخل ما بين بحر و جبل عندك خيل و مربي غنم و طيور و زارع فاكهة .. مش محتاج تتعامل مع ناس مريضة بأمراض الدنيا قلوبها سودا كلها غل و حقد و يكرهولك الخير أو ناس هايفة بتدورلك على أي تلكيكة عشان تعمل معاك مشكلة لمجرد إنك مش على هواهم أو مبادئك مختلفة عنهم .. 

نفسي أعيش مع ناس بسيطة بتحب السلام و المودة و الرحمة.. تكون لسا البراءة عنوانهم .. ناس قلوبها بيضا مبتعرفش تزعل أو تنافق أو حتى تكدب .. ناس بسيطة لا بتحب المظاهر و لاا بتسعى ورا الفلوس .. ناس بتحب الخير للناس حبا في الله.. ناس متأكدة إنها في يوم هترحل من الدنيا.. فعايشة حياتها في سعادة و رضا و قناعة و بتسعي في الخير عشان ربنا يرضى عنها و يطرح فيها البركه.. ناس بتستمتع بأنعام الله و بكل شيء جميل سخره ليهم ربنا  في إطار تحكمه فطرة الله  دون أن يكلفوا نفسهم  فوق  طاقتها راضيين بما قسمه الله لهم و كل أملهم في الحياه إن ربنا يرضى عنهم و يحسن خواتيمهم